Türkmenistan we Rumyniýa ulag pudagyndaky hyzmatdaşlygy pugtalandyrýar
22-nji aprelde Rumyniýanyň Ulag we infrastruktura ministrliginiň binasynda Awtoulag boýunça türkmen-rumyn bilelikdäki komissiýasynyň üçünji mejlisi we Ulag pudagynda hyzmatdaşlyk etmek boýunça türkmen-rumyn iş toparynyň dördünji mejlisi geçirildi. Türkmen wekiliýetine Türkmenistanyň Ministrler Kabinetiniň ýanyndaky Ulag we kommunikasiýalar agentliginiň ýanyndaky «Türkmenawtoulaglary» agentliginiň başlygy G.Akmamedow ýolbaşçylyk etdi. Bu barada Türkmenistanyň DIM-niň resmi saýtynda habar berildi.
Habarda bellenilişi ýaly, mejlisiň gün tertibine laýyklykda taraplar ozal gazanylan ylalaşyklaryň ýerine ýetirilişi we ulag-üstaşyr pudagynda özara peýdaly hyzmatdaşlygyň geljegi bilen baglanyşykly meseleleri ara alyp maslahatlaşdylar. Hyzmatdaşlygyň ýokary derejesini belläp, taraplar ulag pudagynda özara kabul ederlikli hyzmatdaşlygy giňeltmegiň mümkinçilikleri barada pikir alyşdylar.
Iki ýurduň arasyndaky halkara ýük ulaglary, halkara ýol ulaglarynyň ýagdaýy we olary mundan beýlek hem ösdürmegiň meseleleri ara alnyp maslahatlaşyldy.
